Umuhinzi w’i Ngoma yegukanye moto ya nyuma muri Airtel Tunga | eachamps rwanda
Airtel ad Eachamps
Primus Eachamps Ad

Umuhinzi w’i Ngoma yegukanye moto ya nyuma muri Airtel Tunga

Umuhinzi w’i Ngoma yegukanye moto ya nyuma muri Airtel Tunga

Airtel Rwanda yatanze moto ya nyuma ku munyamahirwe muri gahunda ya Tunga imaze gutangwamo izigera kuri 12, mu gihe hasigaye imodoka yo mu bwoko bwa Toyota Avanza ifite agaciro ka miliyoni umunani.

Umugabo witwa Turacyayisaba Daniel usanzwe ukora umwuga w’ubuhinzi n’ubworozi mu Murenge wa Rukira wo mu Karere ka Ngoma, ni we watsindiye moto ya nyuma muri Tunga, yayiherewe ku ishami rya Airtel rya Kimironko kuri uyu wa Kane, tariki 7 Ukuboza 2017.

Mu kiganiro n’itangazamakuru nyuma yo guhabwa moto yegukanye, Turacyayisaba yavuze ko yatangiye gukina ubwo hatangwaga moto ya gatanu muri Airtel Tunga, yakinnye ku ya munani aratsindwa bigeze ku ya nyuma yiyemeza gukoresha uko ashoboye ngo ayegukane.

Yagize ati "Kuri iyi moto ya nyuma natangiye gukina ku wa gatatu w’icyumweru gishize, nshyiramo imbaraga kuko numvaga nshaka kuyitwara. Nakoresheje 120,000 Frw ngira amanota miliyoni zirindwi. Ni ibyishimo, njyewe birarenze kubona washora amafaranga angana gutyo ukaba watsindira moto nk’iyi nshya. Ni ibintu binshimishije cyane kandi bigiye gutuma imibereho ihinduka."

Yatangaje ko agiye kuyifashisha ikamufasha mu mibereho ya buri munsi ariko avuga ko azakomeza umwuga we wo guhinga yo ikamufasha gukomeza kuzamura ibikorwa bye. Turacyayisaba wegukanye moto ya nyuma muri Tunga ya Airtel yayishimiye avuga ko ari ikigo gikomeje gufasha Abanyarwanda kwiteza imbere byiyongera kuri serivisi nziza z’itumanaho itanga.

Munganyinka Liliane wo mu ishami ry’imenyekanishabikorwa muri Airtel Rwanda yavuze ko bishimiye uburyo abantu bitabiriye gahunda ya Airtel Tunga ashishikariza abatarayitabira ndetse n’abayitabiriye gukina bakongera amanota yabafasha kwegukana imodoka isigaye.

Yagize ati "Twatanze moto ya nyuma ya 12 ariko ntabwo ari yo isoje iri rushanwa, murabibona ko hakiri n’imodoka, imfunguzo ngizi turacyazifite ntabwo irabona nyirayo, icyo nakwibutsa abantu, abafatabuguzi n’abatarajya ku murongo wa Airtel ni uko buri muntu wese ashobora kwegukana iyi modoka."

Yavuze ko umunyamahirwe uzayitsindira azamenyekana ku wa Kabiri, tariki 12 Ukuboza 2017, saa sita z’ijoro. Mbere y’icyo gihe abakoresha umuyoboro wa Airtel bashobora gukina kandi ngo amahirwe ashobora gusekera umuntu wese yaba uwakinnye mbere, utarakina ndetse n’abegukanye moto.

Iri irushanwa rya Airtel Tunga rikozwe mu buryo bw’ibibazo byo gusubiza kugira ngo uhatana abashe gutsinda abe yakwegukana imodoka isigaye. Icyo umukiliya asabwa ni ukohereza ubutumwa bugufi yandika “1” akohereza kuri 155 cyangwa se agahamagara 155 akaba yinjiye mu irushanwa agatangira gusubiza ibibazo.

Buri mukiliya ahabwa amanota 100 kuri buri gisubizo nyacyo, ku gisubizo gipfuye akabona amanota 50 y’igerageza. Uwakinnye wese ahabwa inyongera y’amafaranga 11 kuri SMS ashobora gukoreshwa mu kohereza ubutumwa bugufi ku muyoboro wa Airtel kuri Airtel.

07/Dec/ 2017,1 week ago |

Post Your Comment

Comments(0)
Sponsored Content