Volleyball: Gisagara yegukanye igikombe cya shampiyona itsinze REG, mu bagore RRA igitwara APR | eachamps rwanda
Airtel ad Eachamps

Volleyball: Gisagara yegukanye igikombe cya shampiyona itsinze REG, mu bagore RRA igitwara APR

Volleyball: Gisagara yegukanye igikombe cya shampiyona itsinze REG, mu bagore RRA igitwara APR

Ku wa Gatandatu tariki ya 16 Kamena 2018 ni bwo hakinwaga imikino ya nyuma ya playoffs mu mukino w'intoki wa Volleyball mu bagabo n'abagore aho byarangiye ikipe ya Gisagara VC yegukanye igikombe nyuma yo gutsinda REG VC, ni mu gihe mu bagore ikipe y'ikigo cy'igihugu gishinzwe imisoro n'amahoro 'RRA WVC' yegukanye igikombe itsinze APR WVC.

Mu bagabo ikipe ya REG yari yageze ku mukino wa nyuma isezereye UTB, ni mu gihe Gisagara yari yasezereye APR. Kugira ngo ikipe yegukane igikombe cya playoffs ari nacyo cya shampiyona.

Nyuma yo kugera ku mukino wa nyuma ikipe ya Gisagara umuntu yavuga ko yatwaye igikombe biyoroheye kuko umukino ubanza yari yatsindiye REG i Gisagara amaseti 3-1. Umukino wabaye ku wa gatandatu REG yatekerezaga ko wenda ishobora kuwutsinda hakazabaho undi mukino wa kamarampaka ariko siko byaje kugenda kuko Gisagara yabatsinze ibarusha ku maseti 3-0.

Iseti ya mbere yarangiye Gisagara ifite 25-16, iya kabiri iyitsinda 25-18 ni mu gihe iya gatatu yarangiye ari 25-23 maze Gisagara iba yegukanye igikombe ityo nyuma yo gutsinda REG imikino 2 yose.

Mu bagore ikipe ya RRA yaje kwegukana igikombe cya shampiyona nyuma yo gutsinda APR ku mukino wa nyuma imikino yose uko ari ibiri, umukino ubanza yawutsinze ku maseti 3-1 ni mu gihe uwa kabiri wabaye ku wa gatandatu yawutsinze ku maseti 3-2.

Mu guhatanira umwanya wa gatatu mu bagabo n'abagore byabaye ngombwa ko hagomba kuzakinwa umukino wa kamarampaka tariki ya 30 Kamena 2018.

Mu bagabo ikipe ya UTB na APR nizo zihatanira umwanya wa gatatu, umukino ubanza UTB yatsinze APR amaseti 3-1, umukino wabaye ku wa gatandatu APR yatsinze UTB amaseti 3-2. Bivuze ko zinganya umukino 1-1 zikaba zizakina uwa kamarampaka.

Mu guhatanira umwanya wa gatatu mu bagore, Ruhango na KVC nazo zigomba kuzakina umukino wa kamarampaka kuko umukino ubanza KVC yawutsinze ku maseti 3-0, ni mu gihe uwabaye ku wa gatandatu Ruhango yaje kuwutsinda ku maseti 3-2.

18/Jun/ 2018,5 months ago |

Post Your Comment

Comments(0)
Sponsored Content
Loading...