Akari ku mutima wa Masudi Djuma nyuma yo gutandukana na Simba SC | eachamps rwanda
Airtel ad Eachamps

Akari ku mutima wa Masudi Djuma nyuma yo gutandukana na Simba SC

Akari ku mutima wa Masudi Djuma nyuma yo gutandukana na Simba SC

Uwari umutoza wungirije mu ikipe ya Simba SC, umurundi Irambona Masudi Djuma nyuma yo gutandukana na Simba SC yavuze ko aticuza kuba yarerekeje muri iyi kipe naho ibyakozwe bikaba byabaye ku nyungu z'impande zombi.

Irambona Masudi Djuma akaba yaramaze umwaka mu ikipe ya Simba SC ndetse akaba yarayifashije kwegukana igikombe cya shampiyona cy'umwaka ushize.

Inkuru yari imaze iminsi ihwihwiswa mu gihugu cya Tanzania ko umurundi utoza ikipe ya Simba SC ashobora kwirukanwa,  mu gitondo cyo kuri uyu wa Mbere ni bwo ubuyobozi bw'iyi bwemeje kumugaragaro ko basheshe amasezerano na Masudi Djuma.

Nyuma yo gusesa amasezerano Masudi Djuma yavuze ko yishimiye kuba yarabonye akazi muri Simba SC kuko atabikega gusa ngo ashobora kuguma muri Tanzania.

Yagize ati"mbere na mbere ndabanza gushimira Imana, icya kabiri ndashimira ubuyobozi bwa Simba SC bwampaye amahirwe yo kuyigeramo, sinari nziko nzayigeramo ariko nayijemo, akazi karimo kagenda neza ariko burya igifite itangiriro kiba gifite n'iherezo, twafashe umwanzuro wo gusesa amasezerano na Simba bitewe n'ahazaza hacu twese, gusa siryo herezo mu minsi iri mbere mushobora kongera kumbona. "

Bivugwa ko impamvu nyamukuru yatumye atandukana na Simba n'uko umutoza mukuru w'iyi kipe atamushakaga aho yashinjwaga kugumura abakinnyi kugira ngo umutoza yirukanwe asigarane iyi kipe.

Nyuma yo gutandukana na Simba SC biravugwa ko ashobora guhita yerekeza muri mukeba w'iyi kipe Yanga Africans.

Masudi Djuma yinjiye muri Simba SC mu Ukwakira 2017 aho yagiye ari umutoza wungirije, yasanzemo umunya Cameroun, Joseph Omog ari we mutoza mukuru nyuma aza kwirukanwa.

Nyuma uyu mugabo yasigaranye iyi kipe nk'umutoza mukuru by'abagateganyo kugera mu kwezi kwa Mbere 2018 ubwo iyi kipe yazanaga umufaransa Pierre Lechantre akaba ari we mutoza mukuru.

Nyuma yo gusoza shampiyona batwaye igikombe uyu mufaransa yaje gutandukana na Simba SC maze muri Nyakanga 2018 iyi kipe iragizwa umubiligi Patrick Ausems, aba batoza bose bakaba barungirizwaga na Masudi Djuma.

Twabibutsa ko Masudi Djuma yavuye mu Rwanda amaze guhesha igikombe cya shampiyona cy'umwaka w'imikino wa 2016-17 ikipe ya Rayon Sports, mu mwaka wabanje akaba yari yayihesheje igikombe cy'Amahoro.

09/Oct/ 2018,1 week ago |

Post Your Comment

Comments(0)
Sponsored Content
Loading...