'Abo duhanganye muri Miss World bose ntiboroshye ariko nanjye ndakaze'- Miss Iradukunda Liliane | eachamps rwanda
Airtel ad Eachamps

'Abo duhanganye muri Miss World bose ntiboroshye ariko nanjye ndakaze'- Miss Iradukunda Liliane

'Abo duhanganye muri Miss World bose ntiboroshye ariko nanjye ndakaze'- Miss Iradukunda Liliane

Nyampinga w’u Rwanda 2018 Iradukunda Liliane ugiye kwitabira irushanwa ry’ubwiza rya Miss World 2018, yatangaje ko yiteguye gukora ibishoboka byose kugira ngo azitware neza.

Kuri uyu wa 08 Ugushyingo 2018 Nyampinga w’u Rwanda Iradukunda Liliane arahaguruka i Kigali yerekeza i Sanya mu Bushinwa ahazabera irushanwa rya Miss World 2018 ku nshuro ya 68.

Miss Iradukunda Liliane agiye kwitabira iri rushanwa nyuma ya Mutesi Jolly wagiyeyo bwa mbere muri 2016 na Iradukunda Elsa waryitabiriye muri 2017.

Mu kiganiro yagiranye n'itangazamakuru kuri uyu wa 06 Ugushyingo 2018, Miss Iradukunda Liliane yavuze ko yishimiye guhagarira igihugu cye muri iri rushanwa mpuzamahanga, kandi yiteguye kuzagera kure hashoboka, ndetse akaba yarenza aho abamunjirije bageze.

Yagize ati “ ndabizeza kuzitwara neza, nkazakora uko nshoboye kugira ngo nzabashe kugera kure, bakuru banjye bambanjirije hari inzira baba baraciye, ntekereza ko iyo nzira nzagenda nyinyuramo, kugira ngo mbashe kugera kure.”

Uretse kuba abagiyeyo mbere hari icyo yabigiyeho, ngo ni n’umukoro ukomeye, kuko bimusaba gukoresha imbaraga nyinshi, kugira ngo arenze aho bageze, byanaba ngombwa akegukana ikamba.

Uyu mwari w’imyaka 18, yavuze ko yagize umwanya uhagije wo kumenya iby’ingenzi ku bandi bakobwa bazaba bahanganye, ngo ntiboroshye ariko nawe ariyizeye ku buryo nta bwoba bamuteye.

Yagize ati “nagize igihe cyo kureba abo tuzaba duhanganye, ndeba ubuzima bwabo, navuga ko bose batoroshye ariko nanjye ndakaze, niteguye gukora cyane, kugira ngo nzitware neza.”

Mutesi Jolly witabiriye bwa mbere yaje mu bakobwa 24 bagaragaje umushinga mwiza (Beauty With Purpose) naho Iradukunda Elsa uheruka atorwa mu bakobwa batanu b’abanyafurika berekanye umuco wabo.

Ishimwe Dieu Donnee uyobora Rwanda Inspiration Back Up itegura irushanwa rya Nyampinga w’u Rwanda, akanakurikirana nyampinga uba watowe, yavuze ko bishimira intera bamaze gutera muri iri rushanwa rya Miss World bagereranyije n’uko byari bimeze muri 2016.

Yongeyeho ko iri rushanwa ari n’umwanya ukomeye wo kumenyekanisha igihugu ku ruhando mpuzamahanga, ari nayo mpamvu basaba abanyarwanda, kuzamushyigikira bamutora, binyuze mu buryo bwa Applcation ya Mobstar no kuri facebook.

06/Nov/ 2018,1 week ago |

Post Your Comment

Comments(0)
Sponsored Content
Loading...