Kwibuka 25: Ubuzima bwa Rugamba Sipiriyani wapfanye n’umugore we n’abana babo 6 muri Jenoside yakorewe Abatutsi mu 1994 | eachamps rwanda
Airtel ad Eachamps

Kwibuka 25: Ubuzima bwa Rugamba Sipiriyani wapfanye n’umugore we n’abana babo 6 muri Jenoside yakorewe Abatutsi mu 1994

Kwibuka 25: Ubuzima bwa Rugamba Sipiriyani wapfanye n’umugore we n’abana babo 6 muri Jenoside yakorewe Abatutsi mu 1994

Umwanditsi w’ibitabo, umuririmbyi Umusizi, benshi bamufata nk’umuhanuzi, Rugamba Sipiriyani wibukwa ku nshuro ya 25, ni umwe mu bahanzi b’Abanyarwanda bahitanywe na Jenoside yakorewe Abatutsi mu mwaka w’i 1994, ibihangano bye bikaba ari umurage ukomeye yasigiye Abanyarwanda n’ubu bigikoreshwa umunsi ku munsi.

Rugamba yavukiye mu cyahoze ari Komine Karama, ubu ni mu Karere ka Nyamagabe, avuka mu mwaka wa 1935. Yize amashuri ye mu Rwanda, i Burundi ndetse no mu Bubiligi aho yakuye impamyabumenyi y’ikirenga mu by’amateka.

Yize amashuri abanza muri Paruwasi ya Cyanika, ayisumbuye ayiga muri Seminari nto ya Kabgayi, akomereza muri Seminari Nkuru ya Nyakibanda. Yaje kujya muri Kaminuza ya Bujumbura aharangiriza icyiciro cya mbere cy’amashuri makuru, nyuma abona kujya mu Bubiligi muri Kaminuza ya Luve aho yaje gukura impamyabumenyi y’ikirenga mu by’amateka.

Rugamba yaje gukunda umukobwa witwa Mukangiro Saverina, akaba yaramuhimbiye imitoma myinshi amurata imico n’uburanga. Uretse ko uyu mukobwa yaje kwicwa aroshywe mu mazi mu mwaka wa 1963, ibi byaramubabaje cyane kubyakira biranamugora, ariko aza kwishumbusha undi witwaga Mukansanga Daforoza [wari nyina wabo wa Saverina bakundanye bwa mbere].

Ni kuri izo nshuti ze ebyiri Rugamba yatangiriyeho guhimba ibisigo, twavugamo ’Amibukiro’, ’Cyuzuzo’ n’ibindi byinshi. Nyuma Rugamba yaje gushakana na Mukansanga Daphrose (wavutse mu 1944) mu mwaka wa 1965.

Uyu muhanzi kandi yanashinze Itorero Amasimbi n’Amakombe riririmba indirimbo zisingiza Imana ndetse zinigisha ku buzima busanzwe, kugeza n’ubu rikaba rikiriho.

Yakoze imirimo itandukanye muri Leta, ariko mu myaka ye ya nyuma yaje gukurwa mu kazi igihe kitageze, kubera ko atihanganiraga akarengane ako ariko kose, akabyamagana abicishije mu buhanzi bwe.

Mu byaranze Rugamba Sipiriyani harimo gushishikariza Umunyarwanda kuba inyangamugayo no kugira indangagaciro nyazo zikwiriye u Rwanda. Ibi bigaragarira mu ndirimbo zirenga 400 yagiye ahimba zirimo “Ntumpeho”, “Inda nini”, “Jya umenya gusaza utanduranyije cyane”, “Agaca” n’izindi nyinshi.

Rugamba yapfuye azize Jenoside yakorewe Abatutsi muri Mata 1994, akaba we na Mukansanga, umugore we, bari barabyaranye abana 10. Muri Jenoside bapfanye n’abana babo 6, ubu hasigaye abana bane.

Ubu Rugamba yibukwa nk’ umuntu wateje imbere ubuvanganzo nyarwanda ndetse akanafasha abakiri bato kumenya uko ururimi rwacu rwubakwa. Afatwa kandi nk’umutagaifu dore ko kiliziya Gatolika iheruka kumusabira gushyirwa mu rwego rw’abahire ikiciro kibanziriza kugirwa umutagatifu.

Rugamba Cyprien yishwe kuwa 7 Mata 1994, ariko abo mu muryango we bamwibuka by’umwihariko kuwa 15 Kanama , umunsi Rugamba yahisemo mbere y’uko yitaba Imana. Abo mu muryango we bavuga ko yasabye ko igihe yazaba yaratabarutse yazajya yibukwa ku munsi w’Ijyanwa mu ijuru rya Bikiramariya.

Urukundo bagiraga twatumye Kiliziya ibasabira kugirwa Abahire

10/Apr/ 2019,2 months ago |

Post Your Comment

Comments(0)
Sponsored Content
Loading...