Wari uzi ko Orchestre Impala bari barahimbye ururimi rwabo rwihariye? | eachamps rwanda
Airtel ad Eachamps

Wari uzi ko Orchestre Impala bari barahimbye ururimi rwabo rwihariye?

Wari uzi ko Orchestre Impala bari barahimbye ururimi rwabo rwihariye?

“Sling” cyangwa kuzimiza n’ibimwe mu bintu abahanzi bakunda gukoresha baganira cyangwa mu ndirimbo zabo ukumva hari amagambo udasobanukiwe nyamara akenshi ukumva n’ikinyarwanda bavuga, Orchestre Impala n’abo ni bamwe mu bari barahimbye ururimi rwabo rwihariye utapfa gusobanukirwa utari umwe muri bo.

Orchestre Impala ifite indirimbo nyinshi yaririmbye mu bihe byo hambere ariko hari zimwe mu ndirimbo baririmbaga mu rurimi rwabo abantu bamwe bazumva ntibasobanukirwe nibyo baririmba

Orchestre Impala yatangiye mu mwaka wa 1977 iza gutandukana mbere ya Jenoside yakorewe Abatutsi mu 1994, ndetse bamwe mu bayiririmbagamo bicwa muri Jenoside yakorewe Abatutsi , kuri ubu abayitangiye basigaye ni Ngenzi Fidele, Marceline wari umubyinnyi na Mimi la Rose.

Sebigeri Paul uzwi nka Mimi la Rose yavuze ko bari bafite ururimi baziranyeho bakaruvuga kenshi iyo babaga bari kumwe n’abandi bantu cyangwa se bakaruririmba.

Agira ati “Twari dufite ururimi rwacu twihariye ku buryo nta wundi wapfa kurutahura, ku buryo twashoboraga no kukuvuga turi kumwe ntusobanukirwe. Kandi urwo ni ururimi rwacu twari twihariye utasanga ahandi ku isi.”

Akomeza avuga ko urwo rurimi rudafite izina, barukoreshaga bashaka kuvuga ibintu uko babishaka ariko batagamije gukomeretsa abantu.

Atanga urugero avuga ko nk’iyo bashakaga kuvuga ngo “Ni byiza” mu rururimi rwabo bavuganga ngo “Trumor”, bashaka kuvuga ngo “Ni bibi” bakavuga ngo “Ni bewo”. Umukobwa we bamwitaga “Kimwanamwana”.

Mu ndirimbo yabo yitwa “Sipesiyoza” hari aho bagera naho bakaririmba muri urwo rurimi rwabo bagira bati “Mungu Tu wement de Dieu, kipampale kiliye soutient koro koro ki bigambo ti bya kukubita gasopo.”

Mimi la Rose avuga ko bashakaga kuvuga ngo “Impala ziri kumwe n’Imana kandi ko izakomeza kubashyigikira kandi ko abafite ibigambo bazavuga bo bakazakomeza bagakora bikabaha gasopo.”

Akomeza avuga ko na n’ubu abo batangiranye Orchestre Impala bakiriho, bajya baganira muri urwo rurimi abandi bari kumwe bashya ntibabashe gusobanukirwa n’ibyo bavuga.

Orchestre Impala ubwo yatangiraga yitwaga “Vox Pop”. Ariko yahinduye izina kuko Abanyarwanda batumvaga neza igisobanuro cy’iryo zina.

 Mimi La Rose ni umwe mubatangije Orchestre Impala de Kigali

30/Apr/ 2019,1 month ago |

Post Your Comment

Comments(0)
Sponsored Content
Loading...