Nyuma y’ibyumweru bitatu agarutse, Robertinho yasezeye ku ikipe ya Rayon Sports | eachamps rwanda
Airtel ad Eachamps

Nyuma y’ibyumweru bitatu agarutse, Robertinho yasezeye ku ikipe ya Rayon Sports

Nyuma y’ibyumweru  bitatu agarutse, Robertinho yasezeye ku ikipe ya Rayon Sports

Uwari Umutoza wa Rayon Sports, Umunya-Brésil Roberto Oliveira Gonçalves do Carmo yasezeye ku buyobozi bw’iyi kipe, avuga ko agiye gusubira iwabo.

Ku mugoroba wo ku wa Kabiri ni bwo Robertinho yasezeye ku buyobozi bwa Rayon Sports nk’uko umuvugizi wayo, Nkurunziza Jean Paul abitangaza

Ati "Umutoza wacu Robertinho yaraye adusezeye avuga ko ashaka gusubira iwabo muri Brésil. Nta mpamvu n’imwe yigeze aduha. Ni umutoza twari tubanye neza ariko burya iyo umuntu agusezeye muri mu rugamba nk’uru icyo ukora ni ugutekereza uko ubyitwaramo. Ubu tugiye gushaka uko twaziba icyuho cye. Nta kibazo cy’amasezerano yigeze atubwira. Ibyo twari twamwemereye kujya tumuha yabibonaga kandi neza, na we hari ibyo yari yaratwemereye. Yaje turi kwitegura umukino wa Al-Hilal ntihaboneka umwanya wo kwicara ngo dusinye kandi na we nta kibazo yari yarigeze atugaragariza kugeza ejo adusezeye.”

ubu ikipe igiye kuba isigaranywe na Kirasa Alain wari umutoza wungirije mu gihe hagiye gushakwa undi mutoza mukuru wazanatoza umukino wo kwishyura Rayon Sports izahuramo na Al-Hilal tariki ya 25 Kanama 2019 mu ijonjora rya mbere rya CAF Champions League.

Tariki ya 24 Nyakanga 2019 ni bwo Rayon Sports yatangaje ko Robertinho w’imyaka 59 yongereye amasezerano aho yari yemerewe kuzajya ahabwa $4500 ku kwezi.

Uyu mugabo watangiye gutoza mu 2002, yageze mu Rwanda muri Kamena 2018, ahabwa amasezerano y’amezi atandatu yongerewe mu Ukuboza umwaka ushize.

Yafashije Rayon Sports gukora amateka yo kugera muri 1/4 cya CAF Confederation Cup, agera muri 1/4 cya CECAFA Kagame Cup yabereye muri Tanzania, atsindirwa ku mukino wa nyuma w’Igikombe cy’Amahoro 2018 mbere yo kwegukana Shampiyona y’umwaka ushize wa 2018/19.

14/Aug/ 2019,2 months ago |

Post Your Comment

Comments(0)
Sponsored Content