“imikono yari yanditse mu nyuguti nkuru”,FIFA yasubije Misiri ku makimbirane ashingiye kuri Mohamed Salah | eachamps rwanda
Airtel ad Eachamps

“imikono yari yanditse mu nyuguti nkuru”,FIFA yasubije Misiri ku makimbirane ashingiye kuri Mohamed Salah

“imikono yari yanditse mu nyuguti nkuru”,FIFA yasubije Misiri ku makimbirane ashingiye kuri Mohamed Salah

FIFA yasubije Misiri ko amajwi abiri agenewe Mohamed Salah ajyanye n'igihembo cy'umukinnyi wa FIFA mu bagabo cy'uyu mwaka atabazwe kuko imikono yari yanditse mu nyuguti nkuru.

Ishyirahamwe ry'umupira w'amaguru rya Misiri (EFA) ryari ryandikiye FIFA risaba igisobanuro cy'amajwi.

FIFA yagize iti: "Imikono yo ku mpapuro zo gutoreraho yari yanditse mu nyuguti nkuru, bityo yagaragaraga nk'itemewe".

FIFA ivuga ko izo mpapuro z'amatora zanaburagaho umukono wa ngombwa w'umunyamabanga mukuru w'ishyirahamwe EFA.

Iki gihembo cyahawe Lionel Messi ariko mu Misiri bavuga ko amajwi yabo bahaye Salah atabazwe bikabateranya n'uyu mukinnyi.

EFA ivuga ko Shawky Gharib, umutoza w'agateganyo w'ikipe y'igihugu ya Misiri, na kapiteni wayo Ahmed Elmohamady, hari amajwi bahaye rutahizamu Mohamed Salah w'ikipe ya Misiri na Liverpool ariko ntabarwe.

Bavuga ko ayo majwi atanagaragara ku rubuga rwa internet rwa FIFA ahagaragara andi majwi.

FIFA yavuze ko ayo matora yagenzuwe n'indorerezi zigenga zo mu kigo PricewaterhouseCoopers (PwC) Switzerland cyo mu Busuwisi.

FIFA yongeyeho ko ku itariki ya 19 y'ukwa munani yasabye inshuro ebyiri ishyirahamwe EFA gutanga impapuro z'amatora zuzujwe neza, ariko ko nta gisubizo yaboneye ku gihe kugira ngo ayo majwi abarwe.

FIFA yanavuze ko nyuma gato yaho ayo matora atangiriye, ishyirahamwe EFA "hari impinduka nke zarikozwemo".

Kuva ibirori byo gutanga ibihembo bya FIFA by'uyu mwaka byaba, Mohamed Salah yakuye ijambo "Misiri" mu mwirondoro we wo ku rubuga nkoranyambaga rwa Twitter.

Ubu umwirondoro we kuri Twitter ugira uti: "Umukinnyi w'umupira w'amaguru ukinira Liverpool FC."

Yanatangaje ubutumwa kuri Twitter agira ati: "Ibyo bakora byose bagerageza guhindura urukundo mfitiye Misiri, ntacyo bazageraho".

Ku wa mbere nijoro, Messi ni we watsindiye icyo gihembo cy'umukinnyi w'umwaka cya FIFA, aza imbere ya rutahizamu Cristiano Ronaldo wa Juventus ndetse na Virgil van Dijk ukinana na Salah muri Liverpool.

Mu mwaka ushize wa 2018, Salah yabaye uwa gatatu mu bahataniraga icyo gihembo ndetse atsindira n'igihembo cya Puskas cy'igitego cyahize ibindi muri uwo mwaka w'imikino.

Ni bande batora?

Buri gihugu kiba gifite abantu batatu bemerewe gutora: umutoza w'ikipe y'igihugu, kapiteni w'ikipe y'igihugu ndetse n'uhagarariye itangazamakuru.

Ishyirahamwe EFA rivuga ko Gharib na Elmohamady bombi batoye Salah bamubanje mu bandi bahisemo ubwo batoraga.

Hany Danial, wari uhagarariye itangazamakuru, yatoye Sadio Mane, akurikizaho Cristiano Ronaldo, naho Salah amutora ku mwanya wa gatatu.

Ubu si ubwa mbere Salah ababajwe n'ishyirahamwe EFA.

Ubushyamirane bwo mu mwaka ushize bushingiye ku burenganzira ku ikoreshwa ry'ifoto ye, bwatumye avuga ko yashoboraga no kureka gukinira ikipe y'igihugu ya Misiri.

Lionel Messi niwe watwaye igihembo cya FIFA uyu mwaka

Sarah yagiye agirana ibibazo n'ishyirahamwe ry'umupira w'amaguru mu Misiri

Tags

26/Sep/ 2019,1 month ago |

Post Your Comment

Comments(0)
Sponsored Content